Hetuesit kane zbuluar te tjera detaje rreth autorit te masakrës ne Las Vegas ku humben jetën 58 persona e u plagosen qindra te tjerë.
64-vjeçari Stefan Padok nuk kishte vetëm 23 armë në suitën e tij, por gjithashtu edhe 50 kilogramë lëndë shpërthyese. Policia zbuloi në makinën e tij në parkingun e hotelit Mandalaj Bay 1.600 fishekë. Hetuesit besojnë se Padok kishte planifikuar të ikte nga hoteli pas sulmit dhe jo të vriste veten. Autoritetet nuk e përjashtojnë as mundësinë se dikush tjetër ka gisht në këtë histori, plan i cili nuk ka shkuar si ishte parashikuar.
Në vetëm 10 minuta Padok shtiu qindra plumba drejt 22 mijë personave që ndiqnin koncertin. Pas të shtënave një rojë sigurie iu afrua suitës së Padok, por u qëllua me armë. Më shumë se një orë më vonë, policia arriti t’i afrohej dhomës se hotelit, por ishte shumë vonë për të kapur të gjallë agresorin, pasi ai u gjet i vetëvrarë.
Më shumë se 100 eksperte janë ende duke punuar për të zbardhur motivet që e shtynë milionerin 64-vjeçar të kryente një masakër të tillë. Ata shpresonin se e dashura e Padok, Marilu Danlei, do të jepte më shumë të dhëna për që do të çonin në zbardhjen e ngjarjes. Por ajo e përshkroi autorin si një partner të qetë, të dashur e të sjellshëm, madje theksoi se ishte ai qe i kishte blerë biletën për në Filipine dhe më pas i kishte dërguar 100 mijë dollarë në llogarinë e saj.
