Partitë politike në Kosovë i kanë hapur dritën jeshile zgjidhjes së ngërçit. Partia e Behgjet Pacollit nënshkroi marrëveshjen me koalicionin PAN, duke i hapur rrugë formimit të institucioneve të reja të vendit.
Pas nënshkrimit të marrëveshjes, Behgjet Pacollit, është shprehur i kënaqur duke thënë se dalja prej krizës institucionale është interesi kryesor i partisë së tij. Ai shprehet i bindur se do të ketë harmoni në bashkëqeverisjen me kryeministrin e ardhshëm, Ramush Haradinajn, në sfidat që e presin Kosovën.
Kandidati për kryeministër, Ramush Haradinaj, u shpreh se AKR-ja ka sjellë vlera të reja dhe se ky bashkim i mundëson Kosovës një nisje të re.
Ndërsa, kandidati për kryetar parlamenti, Kadri Veseli, tha se kjo është një marrëveshje për qytetarët dhe për Kosovën e zhvilluar drejt BE-së. Ai siguroi se qeveria e re do të formohet brenda pak ditësh.
Në bazë të marrëveshjes së sotme, mes koalicionit PAN dhe AKR-së, kjo e fundit mendohet se do të marrë postin e zëvendës kryeministrit, dhe pesë ministri, atë të punëve të jashtme, të Brendshme, Zhvillimit Ekonomik, Planifikimin Hapësinor dhe Bujqësisë.
Mendohet se ngërçi institucional në Kosovë do të marrë fund më 7 shtator.
