Oto Xhon ikën nga Skënderbeu, rikthehet në Kosovë

Oto Xhon është largimi i parë zyrtar nga Skënderbeu për pjesën e mbetur të sezonit. Ashtu sikundër pritej që të ndodhte, bardhekuqtë janë limituar për të dhënë letrat e futbollistit Nigerian i cili nuk është se tregoi vlera të mëdha me fanelën e Skënderbeut. I ardhur në Korçë si një futbollist që do të bënte diferencën në sulm duke spostuar Guindon në repartin ofensiv të Skënderbeut, pritshmëritë për Oto Xhon ishin të mëdha. Por pas një sezoni e gjysëm në radhët e Skënderbeut mbyllet aventura e tij në Korçë. Trajneri Ilir Daja prej kohësh e kishte nxjerrë jashtë planeve afrikanin dhe klubit i kishte vënë ultimatumin që në këtë hapsirë merkatoje të vinte një emër tjtër në repartin ofensiv. I ndodhur në një situatë të tillë për Oto Xhon çdo sistemim tjetër do të kishte vlerë. Interesi që vinte nga Kosova ishte i madh dhe normalisht që kjo përbënte hapsirën e duhur për Skënderbeun. Në garë ishin Drita e Gjilanit dhe Prishtina por duket se oferta e ekipit të Prishtinës ka bindur bardhekuqtë. Akordi duket se është arritur mes palëve dhe mbeten vetëm disa detaje në kontratë për tu diskutuar. Nga sa bëhet me dije nga burimet pranë klubit, drejtuesit e Skënderbeut dhe të Prishtinës po diskutojnë rreth përqindjes së kartonit të futbollistit. Në kampin kosovar janë të gatshëm të derdhin në arkat e Skënderbeut më shumë se 120 mijë euro për të mbyllur me sukses tratativën, ndërsa në Korçë kërkojnë të mbajnë edhe 20 % të kartonit të lojtarit. Një manovër kjo që ka rezultuar e suksesshme më herët. Në kushte të tilla pritet që gjithçka të finalizohet ditën e sotme. Klubi kryeqytetas nga ana tjetër ka arritur marrëveshjen me sulmuesin e Skënderbeut. Ai do të rikthehet në kampionatin kosovar, teksa më herët ka mbajtur veshur fanellën e Trepça 89’, ku realizoi 25 gola me fanellën e skuadrës nga Mitrovica në sezonin 2016-2017. Oto Xhon pritet të prezantohet te Prishtina në ditët në vijim për të nisur kështu zyrtarisht aventurën me ekipin e kryeqytetit në Superligën Kosovare.