Nga samiti i Komunitetit Politik Evropian, në Danimarkë, Presidentja e Kosovës, Vjosa Osmani, ka kërkuar nga Bashkimi Evropian që të zbatojë atë që thotë.
“Sapo përkujtuam 2-vjetorin e aktit terrorist të Serbisë ndaj vendit tim në veri. Bashkimi Evropian ka kërkuar vazhdimisht llogaridhënie, por nuk ka pasur asnjë. Është koha që të zbatojnë atë që thonë”, tha Osmani.
Osmani nënvizoi se Rusia paraqet kërcënim për Evropën, ndërsa Serbia për rajonin e Ballkanit Perëndimor.
“Serbia trajton shtetet fqinje si shtete që nuk ekzistojnë, si shtete të përkohshme, si shtete ndaj të cilave ajo vepron me agresion. Është kopje e metodave të Rusisë. Fatkeqësisht, Rusia e përkrah Serbinë në këto veprime. Tradicionalisht dhe për shekuj të tërë, ata kanë përdorur një koncept të ngjashëm: Rusia flet për ‘Rusinë e Madhe’ dhe ‘Botën Ruse’, Serbia për ‘Serbinë e Madhe’”, tha Presidentja.
Ajo tha ndër të tjera se se nëse nuk ka influencë pozitive perëndimore, fuqitë malinje të trekëndëshit të së ligesise, që janë Rusia, Kina dhe Irani, gjithmonë vijnë aty, ndaj sipas saj zgjerimi duhet të eci përpara dhe vendet e Ballkanit perëndimor të plotësojnë kriteret./vizionplus.tv
