Akademia Oskar do të mblidhet të shtunën në një takim urgjent për të vendosur fatin e producentit më të famshëm të Hollivud, Harvey Ueinstein.
Regjisori u bë subjekt i zemërimit publik, pas publikimit të një artikulli nga revista “The Nju Yorker” , me akuzat për përdhunim, ngacmime dhe sulme seksuale ndaj 13 aktoreve dhe modeleve në disa dekada nga Ueinstein.
Akuzat kundër tij kanë ardhur nga vajza të reja që shpresonin të ishin pjesë e industrisë së filmit duke përfshirë dhe aktore të famshme si Ashley Judd, Angelina Jolie dhe Rose McGouan.
65-vjeçari i detyronte femrat që ta masazhonin dhe ta shikonin të zhveshur dhe në këmbim të favoreve seksuale, ai i premtonte se do t’i ndihmonte të kishin një karrierë të suksesshme.
Ueinstein ka kërkuar falje për mënyrën se si është sjellë me kolegët në të shkuarën, duke u shprehur se kishte planifikuar që të merrte një pushim të përkohshëm.
Ai është braktisur edhe nga bashkëshortja Georgina Chapman, nëna e dy fëmijëve të tij, e cila i kërkoi divorcin.
Fituesi i çmimit Oskar në vitin 1999 për filmin “Shakespeare in Love”, njëherësh një nga prodhuesit më të mëdhenj të Hollivud, është shkarkuar edhe nga puna nga bordi i kompanisë së tij.
Por akuzat kanë tronditur edhe figura të rëndësishme politike në SHBA. Presidenti Donald Trump tha të shtunën se nuk ishte aspak i befasuar nga zbulimet rreth Ueinstein, një mbështetës i madh i kandidatëve demokratë.
Ish-presidenti Obama dhe bashkëshortja e tij Mishel u shprehën të neveritur nga ky skandal.
Edhe ish-kandidatja demokrate për president Hillary Clinton u shpreh e tmerruar pas akuzave ndaj Ueinstein. Ai ka investuar rreth 1.4 milionë dollarë në fushatën e saj politike vitin e kaluar. Por Klinton deklaroi se të gjitha paratë e investuara nga Harvey do t’i dhurojë për bamirësi.
Edhe Festivali i Filmit në Kane, në një deklaratë, theksoi se sjellje të tilla meritojnë vetëm dënim.
