Parlamenti do të zhvillojë të martën dy mbledhje për të miratuar ndryshimet në rregullore dhe për të ngritur organet e reja të Kuvendit.
Axhenda e seancave plenare dhe përbërja e komisioneve të Parlamentit u diskutua në një mbledhje mes kryetarit të Parlamentit Niko Peleshi dhe kryetarëve të grupeve parlamentare, Taulant Balla nga PS, Gazment Bardhi nga PD e Tedi Blushi nga Partia e Lirisë.
Balla, në emër të mazhorancës, argumentoi nevojën për ndryshimin e komisioneve për t’iu përgjigjur kërkesave të procesit të anëtarësimit në BE.
Por opozita kritikoi gjithë procesin e ndjekur nga socialistët për ndryshimin e rregullores.
Në emër të PD, Gazment Bardhi sqaroi se struktura e Kuvendit, së pari, nuk mund të ndryshohet në forume partie, siç ndodhi në Asamblenë e PS; së dyti, për herë të parë pas dy dekadash, opozitës i është marrë drejtimi i Komisionit të Integrimit, duke e lënë pa asnjë rol në një proces që duhet të jetë gjithëpërfshirës.
Më herët, kryeministri Edi Rama zhvilloi një mbledhje me deputetët socialistë, mbledhje në të cilën u miratuan kryetarët e 7 komisioneve që i takojnë mazhorancës dhe 4 nënkryetarët në komisionet që drejtohen nga PD. Ndërkohë, reformën zgjedhore do ta drejtojë Damian Gjiknuri dhe reformën territoriale Arbjan Mazniku./vizionplus.tv
