Parlamenti i Katalonjës nuk ka qenë asnjëherë në vëmendjen botërore sa sot, ndërsa Spanja ndeshet me një javë pasigurie të thellë politike.
Sytë janë drejtuar nga presidenti katalanas Karles Piuxhmont, i cili pritet këtë mbrëmje të paraqesë rezultatet e referendumit të shumëkërkuar, të cilin Madridi e konsideron si të paligjshëm. Parlamenti rajonal është thirrur të mblidhet këtë të martë rreth orës 18.
Një ditë më parë ka pasur spekulime të forta nëse Puigdemont nuk do të paraqitet në seancën e sotme. Në agjendë është parashikuar të bëhet shpjegimi i situatës politike, por ende nuk dihet nëse në fund do të bëhet deklarata e shpalljes së pavarësisë. Ndërsa ora e mbajtjes së seancës po afrohet, Piuxhmont përgatitet të mbajë fjalimin kyç përpara Parlamentit rajonal.
Presidenti katalanas po përballet gjithashtu me trysninë për të hequr dorë nga planet e shkëputjes nga Spanja.
Franca dhe Gjermania kanë shprehur që të dyja mbështetje për Spanjën e bashkuar. Edhe Brukseli e ka bërë të qartë se një Katalonjë e pavarur do të jetë automatikisht jashtë bllokut, dhe do t’i duhet të nisë nga e para procedurat e anëtarësimit.
Por edhe vetë kryetarja e Bashkisë së Barcelonës e nxiti Puixhmont të mos deklarojë shkëputjen, por gjithashtu i bëri thirrje Mariano Rahoit, të mos e çojë në mendje kontrollin e drejtpërdrejtë nga Madridi. Madridi zyrtar kërcënon të pezullojë autonominë e rajonit veri-lindor. Presioni ekonomik po rritet gjithashtu mbi liderin katalanas, pasi kompanitë e mëdha po vazhdojnë t’i largojnë zyrat e tyre nga rajoni.
Referendumi i 1 tetorit u mbyll me një rezultat prej 90 përqind të votave në favor të ndarjes, por për shkak se ai u mbajt në kundërshtim me vendimet e Gjykatës Kushtetuese të Spanjës, është shpallur i jashtëligjshëm.
