Edhe seanca e sotme u dominua nga kaosi dhe tymi.
Opozita nuk iu nda skenarit të saj për të bllokuar punimet e parlamentit.
Që përpara nisjes se seancës deputetët e opozitës të udhëhequr nga Sali Berisha bllokuan foltoren me karrige, ndërsa u përplasën me efektivët e gardës të cilët kërkonin t’i kontrollin për flakadanë dhe tymuese.
Flamur Noka ishte sërish protagonisti kryesor në konfrontimin me efektivët e gardës. Ai ndezi flakadanë dhe madje një prej tyre e hodhi në drejtim të kryeparlamentares Lindita Nikolla.
Pas këtij veprimi, Nikolla vendosi ta përjashtojë deputetin demokrat.
Por megjithatë Noka nuk pranoi të largohet nga salla dhe teksa deputetët e grupit të Rithemelimit qëndronin në këmbë me tymuese socialistë vijuan te fjalimet nga vendi, duke mos kursyer edhe kritikat për sjelljen e kolegëve opozitare.
Kryetarja e kuvendit ia kujtoi dy herë vendimin për përjashtimin, por ligjvënësi demokrat Flamur Noka vazhdoi të qëndronte në sallë dhe u vuri zjarrin disa letrave që ndodheshin mbi tavolina.
Pas jo më shumë se 20 minutash, mes kaosit dhe përplasjes së tavolinave nga seanca plenare u mbyll.
Ndërkohë jashtë parlamentit ish-kryeministri Sali Berisha tha se ky aksion i opozitës do të vazhdojë.
Lideri i demokratëve e cilësoi skenarin për bllokimin e kuvendit dhe komisioneve parlamentare si sukses./vizionplus.tv