Kreu i Partisë Demokratike, Sali Berisha, në fjalën e tij në protestën kombëtare nga bulevardi “Dëshmorët e Kombit”, u zotua për rikthimin e zgjedhjeve të lira dhe për çlirimin e vendit nga ndikimi i krimit të organizuar, sipas tij.
Gjatë fjalës para mbështetësve, Berisha deklaroi se opozita angazhohet për “zero tolerancë ndaj krimit të organizuar” dhe akuzoi kryeministrin Edi Rama se, sipas tij, përdor organizata kriminale dhe kartele droge për të kontrolluar vullnetin e qytetarëve.
Në vijim, ai iu referua sërish vitit 1991, duke kujtuar periudhën pas themelimit të Partisë Demokratike dhe rrëzimin e shtatores së ish-diktatorit komunist Enver Hoxha. Berisha deklaroi se, ashtu si atëherë, edhe sot opozita është në qendër të vëmendjes së qytetarëve dhe ndërkombëtarëve.
Berisha: Sot, më shumë se kurrë, zotohemi se ne do rikthejmë zgjedhjet e lira në Shqipëri dhe se Shqipëria do të jetë një vend normal, një vend i bekuar siç e ka bërë Zoti, vendi i njerëzve të lirë. Edi Rama përdor organizatat kriminale, kartelet e drogës për të kontrolluar vullnetin e shqiptarëve, për t’i vjedhur, për t’i grabitur. Ne jemi sot këtu për t’u zotuar se zero tolerancë ndaj krimit të organizuar. Shqipëria e lirë, Shqipëria e qytetarëve të lirë do shpallë zgjedhjen e qytetarëve krim të rëndë, do të ndëshkojë dy herë më shumë qeveritarët që largohen. Kanë filluar të ikin. Braktisin Shqipërinë me shpresë se mund të shpëtojnë. Nuk do të gjeni vrimë miu. Në vitin 1991, pak muaj pas themelimit, ata që na shikonin shtronin pyetjen kur shikonin shtatoren e diktatorit, ‘a janë opozitë këta’. Një ditë ne u faktuam shqiptarëve dhe botës se ishim opozitë dhe ishim opozita më e guximshme e evropës. U përballëm me diktatorin më gjakësor dhe e shembëm atë. Sot sytë e Evropës, e mbarë botës, sytë e shqiptarëve janë të drejtuara te ne. Jemi uragani, jemi forca e vertetë. Do shpëtojmë Shqipërinë.
