Opozita e bashkuar kërkon të shtyhet afati për kartat e identitetit dhe pasaportat biometrike deri më datën 30 prill të këtij viti.
Në një letër drejtuar kryetarit të Kuvendit Gramoz Ruçi, kreut të KQZ, Ilirian Celibashi dhe ministrit të Brendshëm Bledi Çuçit, ata argumentojnë se pamundësia ekonomike dhe koha për tu pajisur me një mjet identifikimi, është shumë e shkurtër.
Në letër gjithashtu nënvizohet numri i madh i qytetarëve të cilëve u ka përfunduar afati i vlefshmërisë së letërnjoftimit elektronik dhe pasaportës biometrike që mundëson dhe votimin në zgjedhjet e 25 prillit.
Për shkak të nevojës urgjente, opozita kërkon ndërhyrjen me akt normativ, ku të parashikohet dhe afati i vlefshmërisë.