Kryeministri Edi Rama ka mbajtur mesditën e kësaj të marte konferencën e fundit përpara gazetarëve, ku ka bërë bilancin e punës së qeverisë për vitin që po lëmë pas, por ka iu përgjigjur edhe akuzave të opozitës.
Të gjitha forcat opozitare e kanë mbyllur vitin me protesta, ku kryefjala e tyre është kërkesa për dorëheqjen e kryeministrit Edi Rama.
I pyetur nga gazetarët për këtë kërkesë të opozitës, dhe nëse pritet të ndodhë një gjë e tillë duke patur parasysh edhe akuzat e SPAK ndaj disa zyrtarëve të lartë, kryeministri Rama e mohoi në mënyrë kategorike.
Ai tha se jo më larg se 7 muaj më parë shqiptarët i besuan kësaj shumice mandatin e katërt duke i dhënë jo pak, por 83 mandate.
“Ça është ky muhabet ‘jep dorëheqje’? Ky është viti më i suksesshëm. Në maj shqiptarët i dhanë kësaj force qeverisëse 83 mandate. Dorëheqje për çfarë? Për cilën?”
Sa i përket akuzave ndaj AKSHI-t, Rama tha se ai është institucioni më i suksesshëm, i cili ka ndihmuar Shqipërinë të ecë me hapa të shpejtë drejt Bashkimit Evropian.
“Dorëheqje për AKSHI-n? AKSHI është një institucion krenarie për ne, që të jemi shumë të qartë bashkë. AKSHI është një institucion krenarie. Ju keni qenë këtu kur duhej të shkonit të mbanit radhë për çdo lloj letre, edhe për një çertifikatë, apo kur ata që ju kishit atje, duhet të vinin këtu për të marrë një copë letër sepse nuk e dinin ku ta merrnin. AKSHI ka kursyer 620 milionë euro për shqiptarët falë dixhitalizimit. 7,600 vite pritje në radhë, e dini sa janë 7,600 vite? Janë 25 mijë rrotullime rreth Tokës. Parafytyroni një radhë shqiptarësh që i shkon toka 25 mijë herë rrotull. Janë 33 milionë euro kursime për shqiptarët jashtë vendit, ky është raport ndërkombëtar. Janë 75 milionë fletë letre të kursyera. Një nga arsyet që po ecim kaq shpejt drejt BE-së është AKSHI”, tha Rama.
