Ky është momenti i ndërhyrjes së uniformave blu në zonën e Shkodrës, ku u gjetën dhe asgjësuan 1785 bimë Kannabis Sativa. Operacioni u zhvillua në dy zona në Bjeshkët e Shoshit dhe në fshatin Pult.
Vizion Plus ka mundur të sigurojë pamjet nga momenti i ndërhyrjes se forcave te policisë.
Në të parin u gjetën dhe u asgjësuan 397 bimë, kanabis sativa. ndërsa në të dytin, 1388 bimë. Policia po punon për kapjen e kultivuesve.
Ndërkohë në Tiranë forcat operacionale sekuestruan 60 kilogramë kanabis, si dhe arrestuan dy persona. Siciljan Cakraj dhe Bujar Rryta ranë në prangat e policisë në zonën e unazës së re. Ata lëviznin me një makinë fuoristradë dhe drogën e fshihnin në banesën e Rrytajt në fshatin Larushk. Gjatë kontrollit të shtëpisë, droga u gjet në disa fuçi, ndërsa u sekuestruan dhe tre armë gjahu.
Edhe në Kukës janë asgjësuar 120 rrënjë bimë narkotike, ndërsa është proceduar në gjendje të lirë nje inspektor i shërbimit pyjor për “moskallëzimi i krimit”.
Policia e shtetit vijon operacionin masiv antikanabis në të gjithë territorin e vendit, nga ajri e toka.
