“Pushtimi rus një “fyerje” për ndërgjegjen kolektive të botës”.
Kështu e cilësoi sekretari i Përgjithshëm i Kombeve të Bashkuara, Antonio Guterres, luftën e paprovokuar të Rusisë ndaj Ukrainës.
Komentet, kreu i OKB-së i bëri në mbledhjen e Asamblesë së Përgjithshme, ku u debatua për miratimin e një mocioni që mbështet Kievin dhe i kërkon Kremlinit që të tërhiqet menjëherë dhe pa kushte nga Ukraina.
ANTONIO GUTERRES
SEKRETARI I PËRGJITHSHËM I OKB-SË
“Ky pushtim është një fyerje për ndërgjegjen tonë kolektive.Është një shkelje e Kartës së Kombeve të Bashkuara dhe ligjit ndërkombëtar. Lufta po nxit paqëndrueshmërinë rajonale, tensionet dhe ndarjet globale, duke larguar vëmendjen dhe burimet nga krizat e tjera dhe çështjet e ngutshme Lufta nuk është zgjidhja”.
Guterres u ndal edhe te kërcënimet ruse për përdorimin e mundshëm të armëve bërthamore.
ANTONIO GUTERRES
SEKRETARI I PËRGJITHSHËM I OKB-SË
“Ne kemi dëgjuar kërcënime të nënkuptuara për përdorimin e armëve bërthamore. I ashtuquajturi përdorim taktik i armëve bërthamore është krejtësisht i papranueshëm. Është koha për t’u larguar nga ky qëndrim”.
Ndërkohë Vasily Nebenzya, ambasadori rus në OKB, tha se SHBA dhe aleatët kërkojnë të fusin gjithë boten në luftë.
Në fjalimin e 21 shkurtit drejtuar kombit, Vladimir Putin deklaroi se Moska është “e detyruar të njoftojë pezullimin e pjesëmarrjes në traktatin për armët strategjike”.
