OKB, në alarm nga Siria

Përshkallëzimi i situatës në Alepo ka sjellë reagimin e ashpër të Sekretarit të Përgjithshëm të Kombeve të Bashkuara, i cili ka thënë se ndihet i tronditur nga sulmet ajrorë që u kanë marrë jetën dhjetëra civilëve ne Siri. Duke folur për mediat zëdhënësi i Ban ki Moon, Stefan Dujariç, ka thënë se Kombet e Bashkuara po ndjekin nga afër situatën në terren dhe se përdorimi i armeve të rënda bunker-shkatërruese dhe sulmet e vazhdueshme ajrore, kanë alarmuar OKB-në. Për këtë arsye, zyrtari më i lartë i kësaj organizate i bën thirrje Rusisë dhe Sirisë të frenojnë menjëherë ofensivën e tyre në Alepo dhe të lejojnë armëpushimin. Nga të dhënat e Observatorit Sirian Për të Drejtat e Njeriut më shumë se 45 persona, mes të cilëve dhe 10 fëmijë janë vrarë nga bombardimet. Qëndrimi i ashpër i Ban ki Moon vjen pasi Rusia dhe Siria u akuzuan nga perëndimi si përgjegjëse për sulmin ndaj karvanit të ndihmave të komunitetit ndërkombëtar, duke shkatërruar armëpushimin. Një qëndrim i tillë është përgënjeshtruar nga Moska, e cila ka thënë se këto janë akuza të pabaza.
Që prej nisjes së konfliktit në Siri më shume se 300 mijë persona kanë humbur jetën, mes të cilëve shumë fëmijë.