Politikani i njohur, profesor Paskal Milo, i cili ka mbajtur disa poste të rëndësishme në karrierën e tij të gjatë politike, si ministër i Jashtëm, ministër Integrimi dhe kryetar i Partisë Demokracia Sociale, ka qenë i ftuar këtë të martë në “Quo Vadis” të moderatores Pranvera Borakaj në Vizion Plus.
Milo tha se që prej vitit 2009 nuk sheh më asnjë seancë parlamentare.
Sipas tij, Parlamenti është kthyer në një shesh beteje me luftë verbale, por edhe fizike.
Pjesë nga biseda:
Milo: S’kam besim që do të bëjnë diçka të dobishme për t’i dhënë një figurë demokratike procesit zgjedhor. Duke qenë se tani kam pasur shumë vite angazhim në politikë, më kujtohen të gjitha dyshet kryesore negociatore të të djathtëve dhe socialistëve, e deri te Gjiknuri e Bylykbashi. Janë përpjekur si t’ia hedhin njëri-tjetrit. Dhe kur e kanë kuptuar këtë, kanë hedhur kompromise në dëm të pluralizmit demokratik politik. Këtë e shohim shumë qartë te përbërja e parlamentit aktual, te cilësia, që mbetet për ta thënë të tjerët e jo unë.
Borakaj: A e ndiqni ju një seancë parlamentare?
Milo: Asnjëherë. Pas vitit 2009 nuk ndjek seancat parlamentare, sepse nuk kam kohë. Por ndjek edicionet informative dhe u largohem sherreve karakteristike të parlamentit të viteve të fundit, që veç parlament nuk është, por një shesh beteje me luftë verbale, por edhe fizike fatkeqësisht. Parlamenti aktual është produkt i ndryshimeve që janë bërë rrugës. Në parlament sheh vetëm numra, kartona dhe jo identitete.
/vizionplus.tv
