Kolona prej 65 km e automjeteve të blinduara të ushtrisë ruse që ishin grumbulluar në veri të Kievit është shpërndarë.
Imazhet satelitore treguan se tanket dhe artileritë ushtarake ishin pozicionuar në qytete afër aeroportit Antonov, në veriperëndim të Kievit dhe në pyjet përreth.
Ndërkohë, bombardimet ruse kanë vijuar gjatë natës. Këtë herë në shënjestër ishte një qytet qendror i Ukrainës, Dnipro, në të cilën nuk ka patur shpërthime të mëparshme.
“Ka pasur tre sulme ajrore në qytet, është goditur një kopsht fëmijësh, një ndërtesë me apartamente dhe një fabrikë këpucësh dykatëshe, duke shkaktuar një viktimë” thuhet në një njoftim të shërbimit të emergjencës.
Edhe qyteti veriperëndimor, Lutsk është sulmuar me raketë,ndërsa raportohen 2 ushtarë ukrainas të vdekur.
Autoritetet raportuan se forcat ruse kanë goditur edhe një spital psikiatrik në Izium.
Në spital ishin të shtruar 330 pacientë, ndërsa numri i viktimave nuk është bërë ende i ditur.
Ministra e Shëndetësisë raportoi se 63 spitale janë dëmtuar që nga fillimi i sulmeve ruse, ku pesë mjekë janë vrarë dhe më shumë se 10 të tjerë u plagosën rëndë.
Ndërkohë presidenti i Rusisë, Vladimir Putin gjatë mbledhjes së sigurisë kombëtare deklaroi se do të lejonte vullnetarët të luftonin kundër forcave ukrainase.
VLADIMIR PUTIN
PRESIDENT I RUSISE
“Nëse shihni njerëz që duan të vijnë dhe të ndihmojnë njerëzit që jetojnë në Donbass, ju duhet të bashkëpunoni me ta dhe t’i ndihmoni të lëvizin në zonën e luftës. Kundërshtarët e Rusisë në Ukrainë po bëjnë një gjë të ngjashme. Sponsorizuesit perëndimorë të Ukrainës mos e fshehin, ata po dërgojnë marcenarë.”
Ministri rus i Mbrojtjes tha se kishte 16,000 vullnetarë në Lindjen e Mesme që ishin gati të vinin për të luftuar me forcat e ushtrisë ruse.
