Ministria e Brendshme propozon ndryshimin e ligjit për vetingun në policinë e shtetit, për të ulur kostot dhe për të përshpejtuar nismën që u iniciua nga Fatmir Xhafaj.
Në relacionin që i shkon parlamentit me firmën e ministrit aktual Sandër Lleshaj, theksohet se këto ndryshime do ti kursejnë buxhetit të shtetit rreth 260 milion lek ose rreth 2.6 milion dollarë nga 3 të tilla që ishte përllogaritur në fillim.
Në projektligj theksohet edhe se procesi i vetingut ka filluar 9 muaj me vonesë dhe afati 2-vjeçar për përfundimin e tij, nuk mund të arrihet. Lleshaj propozon që në “ sitën ” e komisionit të jashtëm të vlerësimit të kalojnë vetëm 300 zyrtarët më të lartë , ndërsa punonjësit e nivelit të mesëm drejtues dhe nivelit bazë, mbi 10 mijë efektivë, të hetohen nga shërbimi për çështjet e brendshme dhe ankesave, institucion në varësi të ministrit të brendshëm.
Vetingu në polici është kundërshtuar më herët nga opozita e cila e ka cilësuar një farsë duke mos caktuar edhe anëtarët e saj në nënkomisionin parlamentar për ecurinë e këtij procesi.
Dy javë më parë u përzgjodhën 15 anëtarët e Komisionit të Jashtëm, i cili do funksionojë ashtu si ai i në sistemin e drejtësisë për kryerjen e kontrollit të pasurisë, të figurës dhe aftësive profesionale.
