Gjykata Kushtetuese e Spanjës ka pezulluar sesionin e ardhshëm të parlamentit katalanas, në përpjekje për të shtyrë paralajmërimin e shpalljes së pavarësisë të parashikuar të hënën. Sipas kësaj gjykate, një veprim i tillë do të ishte shkelje e Kushtetutës.
Ndërkohë kryeministri spanjoll Mariano Rajoj tha se nëse lideri i Katalonjes kërkon dialog, ai fillimisht duhet t’i kthehet rrugës së ligjit. Carles Puigdemont vari shpresat tek një ndërmjetësim ndërkombëtar, por Europa është tërhequr. Zyrtarisht, Komisioni Europian nuk është pozicionuar për referendumin .
Një ditë më parë, Presidenti i Katalonjës e akuzoi Mbretin Filipi i VI për injorimin e qëllimshëm të miliona bashkëqytetarëve të tij. Për Puigdemont, ky është një moment që kërkon ndërmjetësim, por monarku ka refuzuar ta marrë përsipër rolin që i ofron Kushtetuta spanjolle, duke u rreshtuar në krah të qeverisë së Rajoyt.
Kriza në Spanjë, vendi me ekonominë e katërt më të madhe BE-se ka tronditur euron duke rritur ndjeshëm koston e borxhit të Madridit. Nga ana tjetër, një komitet ndërpartiak i parlamentit rajonal do të mblidhet për të rënë dakord mbi datën kur do të mbahet seanca plenare per te proceduar mbi pavarësinë.
