Bashkia Pogradec ka nisur pastrimin e lumit të Starovës nga mbetjet urbane dhe bimore. Puna e cila po bëhet me punonjës të ndërmarrjes së punëve publike ka nisur tashmë dhe do të shtrihet nga rruga nacionale deri në breg të liqenit.
Prej vitesh në këtë lumë nuk ishte vënë dorë për pastrimin e tij dhe një ndërhyrje e tillë ishte e nevojshme pasi të gjitha mbetjet përfundonin në liqen. Pas përfundimit të lumit të Starovës do të vijohet me lumin e Vërdovës ku edhe atje do të bëhet e njëjta ndërhyrje për pastrimin e tij. Njkohësisht vijon puna e pastrimit edhe të grykëderdhjes së lumit Starovë në breg të liqenit e cila po i jep një tjetër pamje zonës.
Nga ana tjetër, Bashkia këtë vit ka menduar që vija liqenore prej 5km nga Vilat deri në Tushemisht të jetë një nga më të bukurat dhe më të pastrat duke ofruar kushtet e munguara për pushuesit. Kjo falë mjeteve teknologjike me të cilat po pastrohet rëra, ku bëhet plugimi dhe pastrimi i saj nga barishtet dhe mbetjet e tjera. Ndërkohë që mjeti tekonologjik i blerë bën edhe pastrimin e ujit nga algat që nxjerr liqeni në kohë të ndryshme.
Pastrim gjithashtu është duke u bërë edhe tek Rezidencat Qeveritare ku për pak javë do të nisë edhe puna për rehabilitimin e trotuarit në këtë zonë mjaft e populluar kryesisht mëngjeseve dhe mbrëmjeve.
