“Nuk e sollëm AI në qeveri për të zëvendësuar nëpunësit publikë”, Rama: Gjykimi dhe llogaridhënia mbetet njerëzore
Nga foltorja e Ruhr Summit në North Rhine-Westphalia, Kryeministri Edi Rama foli për përdorimin e inteligjencës artificiale në administratën publike, duke thënë se qeveria shqiptare ka zgjedhur ta integrojë atë jo për të zëvendësuar punonjësit e shtetit, por për të transformuar mënyrën e marrjes së vendimeve administrative.
Rama u ndal te krijimi i Diellës, duke theksuar se qëllimi është rikonceptimi i një prej fushave ku qeverisja demokratike është më e cenueshme: ushtrimi i vendimmarrjes administrative. Ai bëri të ditur gjithashtu se po zhvillohet Gov AI, të cilin e cilësoi si “sistemin nervor” të administratës, që synon të lidhë institucionet dhe të përmirësojë funksionimin e tyre.
Rama: Morëm një vendim që shumë e konsideruan ose vizionar, ose absurd. I dhamë një fytyrë, një zë dhe një emër kësaj inteligjence, e quajtëm Diella. Bëmë diçka që asnjë qeveri nuk e ka bërë deri tani: e emëruam në nivel kabineti. Kur admiruesit dhe kritikët bërtasin me të njëjtin volum zëri, zakonisht ke prekur diçka shumë reale.
Ne nuk e sollëm Inteligjencën Artificiale në qeveri për të zëvendësuar nëpunësit publikë, e sollëm për të rikonceptuar një prej vendeve ku qeverisja demokratike është më e cenueshme: ushtrimin e vendimmarrjes administrative. Demokracia nuk mund t’i delegohet një algoritmi; gjykimi mbetet njerëzor, llogaridhënia mbetet njerëzore.
Ne nuk e zgjodhëm emrin Diella rastësisht. Dielli nuk negocion me hijet, thjesht i largon ato. Përtej Diellës, po ndërtojmë diçka pafundësisht më të rëndësishme, e quajmë Gov AI. Nëse Diella është fytyra e transformimit tonë, Gov AI është sistemi nervor; është shtresa e inteligjencës që në heshtje funksionon nën institucionet e dukshme të shtetit, jo për t’i zëvendësuar ministritë, por për t’i lidhur ato.
Inteligjenca Artificiale shpesh përshkruhet si revolucioni i ardhshëm industrial. Por ky përshkrim është i paplotë. Për qeveritë, ajo është revolucioni i ardhshëm administrativ.
