Është zbardhur dëshmia e katër efektivëve të forcave Shqiponja, të cilët u arrestuan pas masakrës së Dobraçit (30 tetor).
Efektivët u arrestuan nën akuzën se nuk ndaluan personin e tretë misterioz që ndodhej në makinë me viktimat e atentatit në Dobraç, Hamza Lici dhe Arlind Bushati.
Efektivët kanë deklaruar se kanë shkuar në vendin e ngjarjes pasi janë thirrur për aksident, por kur kanë mbërritur kanë kuptuar se bëhet fjalë për atentat. Ata gjithashtu sqarojnë se kanë respektuar proceduart standarde dhe theksojnë se personin e tretë, i cili dyshohet se është Ibrahim Lici, nuk e kanë njohur.
“Prioritet kemi patur që të rrethojmë vendngjarjen sepse ishte kaos i plotë dhe t’i japim ndihmë të plagosurve që ishin ende gjallë”, thuhet ndër të tjera në dëshmi.
Dëshmia e plotë
Ne jemi patrulla e dytë që kemi mbërritur në vendngjarje dhe kur kemi shkuar kemi parë shumë kaos, me shumë persona që ndodheshin aty, rreth 50 vetë. Nuk kemi qenë të planizuar aty por kemi dëgjuar në radio se ka aksident rrugor dhe jemi nisur për atje. Sapo kemi mbërritur kemi respektuar procedurat standard. Dy vetë kemi bërë rrethimin e vendngjarjes për të bllokuar kalimin dhe dy të tjerë kanë qëndruar aty. Pasi mbërritëm kuptuam se nuk bëhet fjalë për aksident rrugor por për vrasje me armë zjarri. Menjëherë kemi njoftuar sallën operative dhe ambulancën njëkohësisht.
Sapo ka mbërritur ambulanca kemi dhënë ndihmën e parë për të plagosurit që ishin ende gjallë për t’i transportuar drejt urgjencës të spitalit. Personin e tretë që flitet nuk e kemi njohur se kush është. Nuk kemi patur asnjë dijeni nëse është Ibrahim Lici apo dikush tjetër sepse nuk e njohim. Prioritet kemi patur që të rrethojmë vendngjarjen sepse ishte kaos i plotë dhe t’i japim ndihmë të plagosurve që ishin ende gjallë.
Ditën e sotme, Gjykata e Shkodrës dha masat e sigurisë për 4 efektivët e arrestuar, Blerim Kurmekaj, Viktor Logu, Julian Sterkaj dhe Marte Martiki.
Ndaj tyre u vendosën masat “detyrim paraqitje”, “ndalim i daljes jashtë shtetit” dhe “pezullim nga detyra”.
Ata u arrestuan dy ditë më parë nën akuzën e “shpërdorimit të detyrës”, pasi lejuan që brenda perimetrit të sigurisë të qëndronin persona të paidentifikuar.
Po ashtu, inspektorët nuk respektuan procedurat për sigurimin e vendit të ngjarjes.
Videot e publikuara pas ngjarjes treguan se një prej personave që ndodhej pranë viktimave mund të jetë i shumëkërkuari, Ibrahim Lici.
Në masakrën e Dobraçit mbetën të vrarë katër persona, mes të cilëve dy bashkëshortë./vizionplus.tv
