Ndërsa kane mbetur pak dite nga afati për hedhjen e kandidaturave per presidentin e Kosovës, Ministri i Punëve të Jashtme Glauk Konjufca ka deklaruar se nëse do të vinte një emër për president nga familja e heroit të Kosovës, Adem Jashari, do të kishte një “konsensus automatik” në shoqëri.
“Konsensus të partive politike, deri tash të vetmit emra që kanë shkaktuar automatikisht një pritje pozitive, një konsensus automatik në shoqërinë tonë është një president nga radhët e familjes së nderuar Jashari”, tha Glauk Konjufca.
Këtë deklaratë Konjufca e bëri pas takimit me kryediplomaten e Shqipërisë Elisa Spiropali e cila vizitoi Kosovën.
Më herët gjatë një konference të përbashkët për shtyp Konjufca u shpreh se qëllimi i mazhorancës nuk është t’i imponojë opozitës emra të përveçshëm për president.
“E keni të qartë që Kushtetua qëllimisht e ka bërë një dallim të zgjedhjes së Qeverisë dhe presidentit. Ideja bazike e atyre që e kanë hartuar besoj ka qenë që presidenti mos me mujt me u zgjedh me shumicë të thjeshtë, që më pas të ketë diskutime mes partive. E tash po foli në emër të mazhorancës që është prej 66 deputetëve. Jemi bindur që nuk ka mundësi që të propozohet një emër i njëanshëm dhe ta marrim mbështetjen e opozitës. Ndoshta e kemi mirë, ndoshta e kemi gabim, por nuk kemi dashur ta mbështesim për muri opozitën me një emër të përveçëm. Për këtë arsye, Kurti ka takuar dy kryetarët e partive kryesore opozitare”, shtoi Glauk Konjufca.
Ministrja e jashtme e Shqipërisë Elisa Spiropali u ndal te gjykimi i ish krereve të UCK-së në Hagë.
“Ne nuk ndërhyjmë në proces dhe nuk paragjykojmë asnjë vendim gjyqësor, por kemi detyrimin moral dhe historik të themi qartë se drejtësia duhet të jetë drejtësi e plotë, pa shkelje të standardeve ndërkombëtare ligjore, pa shkelje të të drejtave të njeriut dhe jo drejtësi e pjesshme. Ajo nuk mund të shkëputet nga konteksti i një lufte çlirimtare të një populli të tërë. Nuk mund të injorojë faktin se në Kosovë ka pasur agresion shtetëror, spastrim etnik dhe krime masive ndaj popullsisë civile shqiptare. Asnjë proces gjyqësor nuk duhet të krijojë perceptimin se historia po rishkruhet në mënyrë të pabalancuar”, deklaroi Elisa Spiropali.
Spiropali tha se ka ardhur koha që brenda vitit 2026 të ketë një takim të përbashkët të dy qeverive. Më pas shefja e diplomacisë pati takime edhe me kryeministrin e Kosovës Albin Kurti dhe presidenten Vjosa Osmani./vizionplus.tv
