“Por unë përdora lëng limoni. Unë përdora lëng limoni!”, u tha me habi policëve McArthur Wheeler, pasi ata i treguan fotografitë e kamerave të sigurisë. Ai ishte i bindur se lëngu i limonit e kishte bërë të padukshëm për kamerat dhe nuk e kuptonte se si fytyra e tij ishte identifikuar kaq lehtë.
Një nga grabitjet më të pazakonta të bankave ndodhi në vitin 1995 në SHBA, kur një burrë me armë, tentoi grabitjen pa bërë asnjë përpjekje për të fshehur fytyrën. Fotografia e tij nga kamerat e sigurisë u transmetua në lajmet televizive të orës 23:00 dhe më pak se një orë më vonë, policia e arrestoi.
Bëhej fjalë për McArthur Wheeler, i cili kishte një “plan” të pazakontë për të mos u identifikuar. Ai besonte se lëngu i limonit mund ta bënte fytyrën e tij të padukshme, njësoj siç përdoret për të krijuar bojë të padukshme. Sipas tij, mjaftonte që të lyente fytyrën me lëng limoni për të mos u kapur nga kamerat.
Para grabitjes, Wheeler dhe bashkëpunëtori i tij, Clifton Earl Johnson, kishin testuar teorinë me një aparat fotografik Polaroid. Kur Wheeler nuk u shfaq në fotografinë që morën, të dy u bindën se ideja kishte funksionuar. Policia më vonë dyshoi se testi kishte dështuar sepse Wheeler mund ta kishte drejtuar pa dashje aparatin drejt tavanit.
Kur u arrestua, Wheeler dëshmoi para policëve se kishte përdorur lëng limoni. Grabitja, e cila u krye me armë, përfundoi me dënime, Johnson u dënua me pesë vite burg, ndërsa Wheeler mori 24 vjet e gjashtë muaj.
Rasti tërhoqi vëmendjen e psikologëve David Dunning dhe Justin Kruger dhe u bë një nga shembujt që frymëzuan studimin e asaj që më vonë u njoh si efekti Dunning-Kruger. Ky fenomen lidhet me prirjen e njerëzve me njohuri ose aftësi të kufizuara për të mbivlerësuar aftësitë e tyre dhe për të mos e kuptuar sa të kufizuara janë ato.
Ky efekt u studiua nga psikologët David Dunning dhe Justin Kruger, të cilët arritën në përfundimin se njerëzit me më pak kompetencë shpesh kanë edhe më pak aftësi për të vlerësuar saktë nivelin e tyre. Historia e grabitësit McArthur Wheeler, i cili besonte se lëngu i limonit e bënte të padukshëm për kamerat, u bë një nga shembujt më të famshëm që lidhen me këtë fenomen psikologjik.
/vizionplus.tv
