Prej një jave qarku i Korçës nuk ka asnjë rast të ri COVID-19. Lajmi konfirmohet nga burime zyrtare të Njësive të Kujdesit Shëndetësor në të gjitha bashkitë e qarkut.
Nga Korça është dërguar vetëm një tampon pasi ka pasur një rast të dyshuar me simptoma të ngjashme me koronavirusin, por fatmirësisht ka rezultuar negativ.
E njëjta gjë ka ndodhur edhe në Pogradec ku burimet zyrtare flasin për një rast të dyshuar të cilit i është bërë tampon, por ka dalë negativ.
Nderkohe edhe 11 tampona të dërguar një ditë më parë të cilat i përkisnin oficerëve të FRONTEX kanë dalë negativë.
Ditën e sotme u janë bërë tamponat edhe 8 oficerëve të tjerë të cilët janë dërguar në ISHP.
Të gjitha analizat e kryera për oficerët e FRONTEX kryhen për shkak të punës së përditshme të tyre dhe kontaktit që ata mund të kenë me emigrantët e paligjshëm që vijnë nga vendet në konflikt, çka e ka detyruar Drejtorinë e Kufirit dhe Migracionit në Korçë që të kërkojë kryerjen e analizave të tyre për të kuptuar nëse janë apo jo të prekur nga COVID-19.
19 raste të konfirmuara me koronavirus janë në të gjithë qarkun e Korçës, ndërkohë që 17 janë të shëruar tashmë dhe vetëm 2 qytetarë janë të sëmurë aktivë.
