E gjithë bota islame festoi këtë të premte Fitër Bajramin. Falja më e madhe është kryer në xhaminë e shenjtë të Mekës në Arabinë Saudite.
Nga faljet mes rrënojave të Gazës, te xhamitë e mëdha të Stambollit, në Evropë e më tej, myslimanët në mbarë botën kremtuan Fitër Bajramin, ndërsa i dhanë fund muajit të shenjtë të Ramazanit.
Këtë vit, Fitër Bajrami në vendet e Gjirit po kalohet nën hijet e luftës në Iran dhe në shumë pjesë të Lindjes së Mesme.
Ndërkohë për palestinezët ky Bajram erdhi ndryshe, pasi xhamia e Al Aksasë, qëndroi e mbyllur në fund të muajit të Ramazanit.
Autoritetet izraelite i detyruan besimtarët muslimanë t’i zhvillonin lutjet jashtë xhamisë së famshme, në qytetin e vjetër.
Madje policia izraelite hodhi gaz lotsjellës teksa besimtarët muslimanë u mblodhën jashtë mureve të Qytetit të Vjetër të Jerusalemit për të gjetur një vend për të kryer lutjet e mëngjesit.
Ndërsa në kryeqytetin libanez, Bejrut lutjet në këtë ditë ishin që lufta mes Hezbollahut dhe Izraelit të mbarojë sa më shpejt.
