Mbi 26,600 maturantë në të gjithë vendin kanë nisur sot provimet e Maturës Shtetërore, duke iu nënshtruar testimit të parë në lëndën e gjuhës së huaj.
Me këtë rast, ministrja e Arsimit, Mirela Kumbaro, ka përcjellë një mesazh inkurajues për maturantët, duke i uruar suksese në një nga etapat më të rëndësishme të jetës së tyre arsimore.
“Sot është një ditë e veçantë dhe plot emocione për mbi 26,600 maturantët tanë, të cilët nisin rrugëtimin e provimeve të Maturës Shtetërore. Dua t’i uroj me gjithë zemër secilit prej jush mbarësi dhe shumë suksese”, shprehet ministrja.
Sipas Kumbaros, për të garantuar zhvillimin korrekt dhe të qetë të procesit, në 144 qendra provimi në të gjithë vendin janë angazhuar mbi 2 mijë mësues administratorë, 170 monitorues të Ministrisë së Arsimit dhe 650 vlerësues.
Ministrja theksoi se i gjithë stafi i përfshirë do të ndjekë me përkushtim çdo fazë të provimeve, me qëllim garantimin e standardeve dhe integritetit të procesit.
Në përfundim të mesazhit të saj, Kumbaro uroi që kjo periudhë të shënojë fillimin e një rruge të suksesshme për të rinjtë drejt universiteteve dhe profesioneve që synojnë të ndjekin në të ardhmen.
/vizionplus.tv
