Hyn në fuqi vendimi i presidentit amerikan Donald Trump për rritjen e taksave të reja për importet e aluminit dhe çelikut për aleatët kryesore, Kanadanë, BE-në dhe Meksikën. Presidenti i Komisionit Europian Jean-Claude Juncker, njoftoi këtë të premte se blloku do të përgjigjet me të njëjtën mënyrë.
“Shtetet e Bashkuara tani nuk na lënë asnjë zgjidhje tjetër përveçse të vazhdojmë të gjejmë një zgjidhje për këtë çështje dhe me vendosjen e detyrimeve shtesë për një numër importesh nga Shtetet e Bashkuara. Ne insistojmë për respektimin e rregullave të OBT-së.”
Junker theksoi se tarifat amerikane kërcënojnë të shkaktojnë një luftë globale tregtare. Unioni pritet të ndikojë në eksportin e SHBA-se me vendosjen e detyrimeve shtesë me vlerë rreth 7.5 miliardë dollarë për një numër produktesh importi nga Shtetet e Bashkuara.
Edhe Kanadaja pritet të vendosë tarifa për mallrat amerikane. Ministrja e Jashtme kanadeze, Chrystia Freeland, prezantoi planin e hakmarrjes, ndërsa kryeministri kanadez Justin Trudeau, tha se “tarifat e SHBA janë krejtësisht të papranueshme.”
“Më lejoni të jem i qartë, këto tarifa janë krejtësisht të papranueshme. Besoj se do të ketë një moment për të arritur një kompromis të përbashkët. Por ne nuk po shohim asnjë shenjë të dëshirës për një marrëveshje në vendimin e SHBA-se sot.”
Presidenti francez Emmanuel Macron, e cilësoi vendimin e Trump një gabim dhe se taksat e reja mbi importet e metaleve nga Evropa, janë te paligjshme.
“Përgjigjet e njëanshme dhe kërcënimet mbi luftën tregtare nuk do të zgjidhin asgjë nga pabarazitë serioze në tregtinë botërore. Asgjë! Vendimi I sotëm është I paligjshëm dhe do të nxisë luftëra dypalëshe tregtare … pra një rritje të çmimeve dhe një rritje të papunësisë”.
Macron njoftoi se do të diskutojë me presidentin Trump lidhur me taksat e reja. Kancelaria gjermane, gjithashtu tha se Bashkimi Europian i ka bërë gati përgatitjet e nevojshme për t’iu kundërpërgjigjur çmimeve të reja të SHBA-se.
Donald Trump vendosi në muajin mars rritjen e tarifave për importet e çelikut dhe aluminit si pjesë e planit të tij “Amerika e Para”, e cila synon mbrojtjen e prodhuesit amerikan, duke shpërfillur njëherësh paralajmërimet e përsëritura nga një numër i madh i aleatëve të tij, me në krye Bashkimin Evropian, mbi rreziqet e një lufte tregtare me pasoja të paparashikueshme.
