Ngrohja globale ka ndikuar negativisht te ulja e prurjes së lumenjëve, por edhe te reduktimi i prodhimit të energjisë elektrike, kilovati i së cilës vitet e fundit po tarifohet më shtrenjtë. Gjithnjë e më shumë faturat po bëhen të papërballuehsme nga familjet shqiptare.
Ndikuar nga kjo, por edhe eksperienca pozitive e vendeve të rajonit ka bërë që mjaft familje të mendojnë si zgjidhje instalimin e paneleve diellore ne catitë e banesave të tyre për të prodhuar energji. Pavarësisht se ligji për energjinë e rinovueshme ka vite që është funksional nuk kanë dalë aktet nënligjore.
Qytetari Fatmir Çekrezi nga qyteti i Elbasanit tregon sesi para katër viteve me ndihmën e djemëve ka instaluar një impant për prodhimin e energjisë elektrike , por që nuk ka mundur ta vërë në funksion. Qytetari thotë se ka kërkuar një kontator me dy drejtime, në mënyrë që energjinë të cilën e prodhon gjatë ditës të mund ta përdorë natën, kur dhe konsumin e energjisë e ka më të lartë, por pavarësisht kërkesave thotë se nuk ka gjetur zgjidhje.
Nese jashtë Shqipërisë investime të kësaj natyre subvencionohen nga shteti, në vendin tonë jo vetëm që nuk ndodh kështu por nuk krijohen hapësirat e duhura që qytetarët të investojnë. Ky qytetar thotë se investimi i tij prej 3500 euro ka shkuar dëm.
Burime pranë OSHEE, Elbasan bëjnë me dije se për raste të tilla nuk kanë rekomandime nga Minsitria e Energjitikës. Mësohet se kjo e fundit ka zhvilluar një takim me grupet e interesit pak ditë më parë, por ende nuk është ofruar zgjidhje konkrete.
