Pastori Akil Pano e ka konsideruar tragjedinë e familjes Josifi në Kombinat një histori horror që nuk ka lidhje me traditën e Kishës Protestante ose Ungjillore.
Në një lidhje skype me edicionin qendror të lajmeve në “Vizion Plus”, Pano deklaroi se nëna dhe dy vajzat e saj mund të jenë manipuluar edhe nga grupe të caktuar sektare, për të cilat tha se duhet të hetohen.
Para se të trajtohet çështja e fesë, pastori pohoi se duhet parë edhe psikoanaliza e tyre.
“Unë kam marrë informacione vetëm nëpërmjet portaleve dhe kronikave të medias. E kam pritur me një trishtim shumë të madh. Nuk e njihja familjen. Është një histori që na ka lanë pa fjalë, është një histori horrori. Nuk ka lidhje me praktikat kristiane. Diçka e padëgjuar më parë, në traditën krisitiane të Kishës Protestante ose Ungjillore. Familja Josifi është një familje, e cila përballej me kushte të vecanta. Një baba që ishte vetëvrarë më parë, një nënë e vetmuar. Kushtet ekonomike shumë të vështira, Kjo histori me trauma i ka shoqëruar. Para se të trajtojmë çështjen e fesë, duhet parë psikoanaliza e këtyre dy personave. Unë shoh izolimin e skajshëm. Rreth 2 vite me radhë ato nuk dilnin nga shtëpia e tyre. Mbase edhe manipulimi që vjen nga grupe të caktuara sektare, të cilat duhet të hetohen. Organet e hetimit duhet të veprojnë dhe të ushtrojnë detyrën e tyre maksimalisht.
I pyetur nëse kjo ngjarje mund të dëmtojë kredibilitetin e feve kryesore, monoteiste, Pano tha:
“Fetë kryesore monotoiste janë fe të cilat janë në shoqërinë njerëzore bashkëudhëtare të njeriut prej më shumë se 2 mijë vitesh. Vetëvrasja është parë historikisht nga Kisha e Krishterë si një mëkat, si një element që dallon besimtarin e vërtetë praktikant me atë që nuk është besimtar. Në Shqipëri, numri i vetëvrasje është i lartë, 3 herë më i lartë se numri i vrasjeve. Ky është një sinjal i lartë alarmi për të gjithë shoqërinë tonë. Duajeni jetën si dhuratën më të çmuar të Zotit.”
