Kryeministri Edi Rama ka reaguar në rrjetet sociale lidhur me protestat kundër projektit në Zvërnec, duke publikuar disa prej pankartave dhe memeve të shfaqura gjatë tubimeve të qytetarëve.
Përmes një postimi në Facebook, Rama ironizoi protestuesit dhe atë që e quajti “revolucioni imagjinar i flamingove”, ndërsa vlerësoi kreativitetin e materialeve satirike që kanë qarkulluar gjatë ditëve të fundit.
“RROFTË MEMEMANIA. Që të merremi vesh se mos krijohet bindja e gabuar që mua s’më pëlqen asgjë nga ky revolucioni imagjinar i flamingove. Aq sa më ngjallin keqardhje me përzierje rropullish fjalimet krra-krra-krra, aq më argëton kreativiteti i memeve, për të cilat sinqerisht u përcjell përgëzime e falënderime autorëve”, shkroi Rama.
Kreu i qeverisë shtoi se disa nga materialet që i kanë tërhequr vëmendjen nuk mund t’i publikojë për shkak të përmbajtjes së tyre.
“Më vjen keq vërtet që disa të preferuara të tjera nuk i postoj këtu dot, se janë shumë të nxehta dhe kot melazëm na krijohen keqkuptime të reja, a thua s’na mjaftojnë këto që kemi për rreziqet imagjinare nga një projekt që do transformojë më tej Shqipërinë”, u shpreh ai.
Reagimi i Ramës vjen në një kohë kur protestat kundër investimit në Zvërnec kanë vijuar për ditë me radhë.
Ditën e djeshme qytetarët dhe aktivistët u mblodhën në sheshin “Skënderbej” për të tetën ditë, ndërsa kanë paralajmëruar sërish protestën e radhës sot, 8 qershor.
