Pezullohet shërbimi i transportit publik për një afat të pacaktuar në kryeqytet. Bashkia e Tiranës njofton qytetarët se ky vendim vjen në vijim të planit të masave mbrojtëse me qëllim parandalimin e përhapjes së koronavirusit.
“Për sa më sipër, prej orës 05:00 të ditës së nesërme, këto linja do të ndërpriten deri në një njoftim të dytë: – Shërbimi i transportit qytetas (linjat brenda qytetit të Tiranës); – Shërbimi i transportit rrethqytetas (linjat që lidhin qytetin e Tiranës me ish njësitë administrative/ komunat); – Shërbimi i transportit ndërqytetas ushqyes (linjat që lidhin Bashkinë e Tiranës me Bashkinë e Kamzës dhe Bashkinë e Vorës)”, thuhet në njoftim.
Kryeministri Edi Rama njoftoi këtë të mërkurë se një masë e tillë do të merret ditët në vijim edhe në Durrës. Kreu i qeverisë argumentoi se transporti urban do të mbyllet në Tiranë dhe Durrës për shkak të numrit më të lartë të të prekurve me COVID 19 krahasuar me vendet e tjera.
