Ashtu sikurse pritej, Komiteti Teknik i Ekspertëve njoftoi këtë të enjte një lehtësim të masave anti-COVID. Kryetarja e Komitetit, Mira Rakacolli deklaroi se nga data 1 qershor, do të hiqet maska në ambientet e jashtme.
Detyrimi për mbajtjen e barrierës mbrojtëse do të ngelet në fuqi vetëm në ambientet e mbyllura dhe në mjetet e transportit publik. Po ashtu, nga dita e parë e qershorit, do të shtyhet ora policore, nga ora 22.00 deri në 23.00.
Klubet e natës dhe diskot do të vijojnë të mbyllura, ndërsa muzika do të lejohet deri në orën 22.00. Duke nisur nga data 15 qershor, do të ketë një lehtësim edhe përsa u takon grumbullimeve, duke lejuar që të bëhen bashkë 15 persona në ambientet e jashtme.
