Nga viti i ardhshëm, të gjithë qytetarët edhe shtresa më vulnerabël, do të jenë me një llogari bankare. Projektligji i miratuar nga qeveria për llogarinë bankare me shërbime bazike parashikon, pavarësisht të ardhurave, vendndodhjes apo statusit, çdo kush si studentet, individët me ndihmë ekonomike, pensionit do të kenë një llogari bankare si dhe një kartë, pa kosto. Drejtori i Mbikëqyrjes në bankën e Shqipërisë Deniz Deralla, i ftuar në E-ZONE në Vizon Plus tha se qëllimi është formalizimi i ekonomisë dhe dekurajimi i përdorimit të parasë cash.
“Bankat janë të detyruara të hapin llogari bankare me kërkesë të individit. Të përjashtuar do të jenë vetëm ata që janë nën hetim për pastrim parash. Ne do të gjejmë mekanizmat për të shtyrë shtresat vulnerabël të popullatës të hapin këtë llogari bankare, psh: pensionistët që sot përdorin postën shqiptare, nesër mund të përdorin një kartë bankare. E rëndësishme është që kjo llogari do të jetë pa kosto duke ofruar shërbime bazike brenda vendit dhe me kosto minimale nëse kryhen transaksione jashtë vendit”, – sqaroi Deralla në E-ZONE.
Por si do të zbatohet në praktikë një projektligj i tillë, pasi bankat nuk janë shtrirë në të gjitha zonat? Sektori i mikrofinancës do të ishte një agjent i cili ka shtrirjen e duhur në terren.
“Qëllimi nuk është vetëm hapja e një llogarie bankare. Ne duam që të operojmë si një bankë, pra të kryejmë këtë proces, por jo nga zyra siç e bën banka, por në terren. Në finale fokusi është ti ofrojmë qytetarit shërbimin që ka nevojë”, -sqaroi Heriola Spahiu në emisionin E-ZONE në Vizion Plus.
Por ekspertët e shohin më skepticizëm këtë nisëm, që pritet të miratohet nga parlamenti. Shkak për këtë mbetet edukimi i ulët financiar i popullatës.
“Unë mendojë se ky projektligj nuk do të ketë sukses. Niveli i edukimit financiar është shumë i ulët dhe qytetarët nuk do të nxiten për tu përfshirë në këtë nisëm. Pikë së pari bankat dhe qeveria duhet të fokusohet tek edukimi financiarë e më pas të vijojë më përfshirjen e popullatës në tregun financiare. Banka duhet të jenë më aktive në këtë drejtim”, -tha Artan Gjergji ekspert i tregjeve financiare
Në vendin tonë numërohen rreth 1.4 milion karta bankare. Mesatarisht kryhen rreth 4.7 miliardë lekë transaksione në një muaj, në mënyrë elektronike. Këto janë shifra të ulëta në raport me vendet e rajonit.
