“Të gjithë titujt janë në dorën tonë, nëse do tregohemi të përqendruar mund t’ia dalim” kështu është shprehur së fundmi Neymar, i cili beson fort se Barcelona mund të fitojë një tripletë titujsh këtë sezon. Katalanasit kanë dy pikë diferencë me Realin e Madridit në La Liga, ndërsa janë në finale të Kupës së Mbretit dhe në Champions League arritën të kualifikoheshin përballë PSG falë një mrekullie 6-1 në Camp Nou.
“Atë ndeshje e përjetova si një sfidë tejet të rëndësishme pasi të gjithë luajtëm në limitet e së pamundurës. Ishte një fitore që na dha shumë eufori” – tha Neymar në një intervistë për Mundo Deportivon. Sulmuesi brazilian, i cili në fundjavë kundër Granadas ka shansin të shkoi në kuotën e 100 realizimeve me fanellën e Barcelonës, theksoi se katalanasit mund t’i fitojnë të gjitha trofetë e mundshëm këtë sezon. Në këtë mënyrë Neymar i hap sfidë direkte Juventusit, skuadër të cilën Barcelona e ndesh në cerek-finalet e Champions League-ës, por edhe Realit të Madridit.
Me Los Blancos Barca luan klasiken direkte në muajin prill, muaj që mund të vendosë gjithçka. 25-vjecari foli edhe për merkaton. Ai theksoi se ëndrra e tij e fëmijërisë ka qenë që të luante për Barcelonën, gjë të cilën, sikurse tha, do të vazhdojë ta bëjë deri në fund të kontratës, kontratë që përfundon në vitin 2021. Neymar ndër të tjera tha se i vinte keq se Luis Enrique nuk do të ishte më trajner i katalanasve për sezonin e ardhshëm, por që sidoqoftë, sipas tij, për të do jetë një sfidë e re, kushdoqoftë trajneri i ardhshëm.
