Kryeministri izraelit Benjamin Netanyahu e ka cilësuar Britaninë e Madhe si një “Republikë Islamike”, gjatë një interviste në podcastin e Army Radio.
Duke iu referuar Randolph Churchill, djalit të Winston Churchill, dhe nipit të tij, Winston Spencer Churchill, të cilët kishin punuar si gazetarë, Netanyahu tha se ata kishin raportuar në mënyrë shumë pozitive për Izraelin gjatë Luftës Gjashtëditore.
“Përpiquni të gjeni diçka të tillë tani në Britani, të cilën mund ta quani Republika Islamike e Britanisë”, tha Netanyahu duke qeshur.
I pyetur nëse mendonte se “e gjithë Evropa është kështu”, Netanyahu u përgjigj “po”, duke iu referuar komuniteteve myslimane në vendet evropiane dhe qëndrimit gjithnjë e më kritik të disa qeverive evropiane ndaj Izraelit.
Më tej, Netanyahu tha me ironi: “Republika e parë Islamike me armë bërthamore do të jetë Republika Islamike e Britanisë”, duke shtuar se Izraeli po kujdeset që të mos ketë një tjetër të tillë në Iran.
