Teksa raportonte mbi zhvillimin e procesit të votimit në të gjashta bashkitë e vendit, nënkryetarja e KQZ-së, Lealba Pelniku deklaroi se 99 për qind e qendrave të votimit kanë pasur identifikim elektronik.
Për shkak të vështirësive klimatike në Shkodër, sqaroi Pelniku, në tre qendra votimi nuk është përdorur pajisja e identifikimit.
“Lidhur me implementimin e teknologjisë për identifikimin elektronik, ashtu siç është raportuar bëhet fjalë për një mbulim të 99% të qendrave të votimit. Situata e djeshme na jepte një panoramë të mbulimit 100% në të gjitha qendrat e votimit me operator. Në fakt për problematikat që lidhen me vështirësitë që kanë krijuar kushtet në zonën e Shkodrës, bëhet fjalë për 3 qendra votimi. Duke qenë se operatori për shkak të motit, nuk është paraqitur. Kemi një qendër në Durrës dhe Dibër, na është bërë e ditur në 7 të mëngjesit dhe nuk kemi bërë dot zëvendësimin e operatorit. 15 pajisje janë zëvendësuar ditën e sotme. Në momentin që është bërë në përputhje me kodin zgjedhor, nuk paraqet problem nga ana ligjore.”
