Ndryshimet në kabinetin qeveritar ishin temë diskutimi mbrëmjen e sotme në studion e Quo Vadis të moderatores Pranvera Borakaj në Vizion Plus.
I ftuar në studio, eksperti i ekonomisë Ergis Sefa tha se, nëse analizohen emrat, duket si një qeveri teknike. Sipas tij, ministrat e rinj janë të profilit për të çuar përpara reformat që i duhen vendit për në BE.
Pjesë nga biseda:
Sefa: Sot në botën politike dominon gjeopolitika dhe gjeoekonomia. Unë mendoj se forca politike në pushtet ka një hall. Mua më duket si një qeveri teknike brenda të njëjtit krah. Po t’i marrësh emrat me radhë, shohim se janë emra teknikë.
Zili: Duhet të biem dakord se çfarë do të thotë qeveri teknike.
Sefa: Emra që kanë më shumë profil teknik. Çështja është kujt grupimi i përkasin. Flasin për faktet, pastaj bindjet politike janë tjetër gjë. Tre nga ministrat e rinj janë drejtues të grupkapitujve. Lëvizjet që po bëhen, edhe në mënyrën se si bëhen, më tregojnë se kemi një problem të madh me infrastrukturën. Në mars apo në prill do të kemi shkëputje të Ministrisë së Infrastrukturës.
Pse s’e bëri tani? Do të duhej të bënte ndryshime në buxhet, sepse ka peshën më të madhe. Prandaj pesha që mbante zonja në këtë post ishte shumë e madhe. Po të shohim personin që ka vënë në krye, është një person që është marrë me energjinë që nga ER, OSHEE dhe tani ministër. Është person që është marrë vetëm me energjinë. Zoti Nufi, në fund fare, ka qenë zv/sekretar i Këshillit të Ministrave, është marrë thellësisht me çështje administrative-juridike. Ish-ministri i Drejtësisë, Lamallari, është zv/ministër i Brendshëm më jetëgjatë, rikthehet në “habitatin” e vet.
