Kryetari i “Bindja Demokratike”, Astrit Patozi e konsideroi një lajm të mirë shtyrjen e ndyshimeve kushtetuese në Kodin Zgjedhor për javën tjetër.
I ftuar në studion e lajmeve në “Vizion Plus”, Patozi theksoi se ditët e ardhshme do të jenë përcaktuese për Kodin Zgjedhor.
Për Patozin, PS po kërkon që të vendosë në mënyrë të njëanshme rregullat e lojës dhe se “i shet listat si të hapura”. Mirëpo, ai shprehet i bindur si diçka e tillë nuk do të ndodhë.
“Drafti Gjiknuri shitet sikur është e hapur. Lajm i mirë është se ky draft nuk do të qëndrojë, do të ndryshojë. Këto 3-4 ditë do të jenë përcaktuese për të pasur një variant tjetër, jo atë të servirur nga mazhoranca. Mund të jetë një zgjedhje kompromisi. PS kërkon të vendosë e vetme rregullat e lojës. Nuk ka ndodhur asnjëherë në Shqipëri që një aktor të përcaktojë i vetëm dhe në mënyrë të njëanshme rregullin e lojës.”
I pyetur se cila prej partive politike po bën propozime me të pranueshme, Patozi u shpreh se draft i PD-së është më afër interesit të publikut, pasi kërkon lista 100 për qind të hapura.
“Unë mendoj që në stadin ku jemi sot, PD është më afër nesh. Më afër interesit të publikut, sepse propozon 100 për qind lista të hapura. Është zgjedhja më e mirë. PS thotë se koalicionet prishen në formën e tyre klasike. Ata bëjmë sikur listat janë të hapura, ndërkohë i mbajnë të mbyllura. Rama ka të gjithë aspektin opozitar kundër. Rama i bie që të bëjë zgjedhje vetëm me veten e tij. Unë besoj që s’ka për të ndodhur. Këtë javë do të ndodhin ndryshime. Puna është se çfarë ndryshimesh do të bëhen. Unë mendoj që kjo javë është përcaktuese nga mënyrë se si do të shkruhet Kodi dhe si do votohet në Paralment. Nëse listat hapen realisht, me cilindo variant, unë mendoj që kjo është një çarje dige e partitokracisë si regjim shtypës që ka shkaktuar të gjitha krizat politike në Shqipëri. Forcat e reja politike apo aktorët e rinj që duan ndryshimin do të kenë mundësi që të përfaqësohen. Nuk ka parti të vogla e të mëdha, por serioze dhe jo serioze.”
Sipas tij, në zgjedhjet e ardhshme, shqiptarët do të kenë më shumë mundësi për t’u përfaqësuar.
