Ministrja e Shëndetësisë, Ogerta Manastirliu, nga materniteti “Mbretëresha Geraldinë”, ku është hapur një pavion i vecantë për nënat e dyshuara apo të prekura nga COVID19, deklaroi se të gjitha masat e marra në maternitete kanë rezultuar efikase për mbrojtjen e nënave dhe bebeve nga epidemeia e shkaktuar nga koronavirusi.
“Ky pavion i vecantë, i dedikuar për rastet COVID, me staf të dedikuar është një ndër masat për përballimin e kësaj situate, edhe në maternitete, ku po bëhet një punë e jashtëzakonshme për sigurinë e nënave dhe të porsalindurve”, tha Manastirliu.
Ministrja e Shëndetësisë ka vizituar edhe një nënë të re 27-vjeçare nga perferia e Tiranës, e cila, ka sjellë në jetë shëndosh e mirë vajzën e saj. Sipas mjekëve, ky është një rast shumë i rrallë sepse nëna ka mungesë të një pulmoni dhe një veshke.
“Kjo është një mrekulli e jetës. Ne kemi një ekip të mrekullueshëm, që edhe në kohë pandemie bëjnë një punë shumë të madhe në të gjithë sistemin tonë shëndetësor, ku po ofrohen shërbime jo vetëm për pacientët me COVID por për të gjithë qytetarët që kanë nevojë”.
Mes të tjerash, Manastirliu tha se në maternitetin e Tiranës do të realizohet një investim 6.4 milion euro për dyfishimin e kapaciteteve dhe pajisjen me aparatura të teknologjisë së lartë në këtë maternitet.
“Kemi kohë që po punojmë dhe lajmi i mirë është që jemi gati për fillimin e procedurave për rindërtimin dhe zgjerimin e spitalit Mbretëresha Gerladinë, një investim prej 6.4 milion euro nga qeveria shqiptare, I programuar në buxhetin e këtij vit.”
