Nderimet e fundit për policin, përcillet efektivi i “Shqiponjave”, vijojnë kërkimet për vrasësin

Efektivi i policisë Novruz Cenalia  i cili u vra dy ditë më parë në fshatin Baltëz të Fierit pas një konflikti të çastit me 23 vjeçarin Azgan Mernica u përcoll këtë të mërkurë për në banesën e fundit.

Në hollin e teatrit Bylis në Fier u vendos arkmorti  ku u mbajtën homazhe nga familjarët, kolegët dhe qytetarë të shumtë të cilët i bënë nderimet e fundit.

Ministri i Brendshëm Taulant Balla, drejtori i përgjithshëm i policisë së shtetit  si dhe drejtues të pushtetit lokal morën pjesë në ceremoninë e përcjelljes së policit të shqiponjave Novruz Cenaliaj.

Ndërkohë dy ditë pas ngjarjes, autori i kësaj vrasje Azgan Mernica është ende  në arrati dhe i armatosur.

Forcat e policisë, forcat speciale Renea kanë vijuar kërkimet për gjetjen e vrasësit duke kontrolluar disa banesa në fshatrat rreth Fierit. Por kontrollet janë  shtrirë edhe në disa qytete të jugut të vendit. /vizionplus.tv