Ish-presidenti francez Nikolas Sarkozy është ndaluar nga policia për t’u marrë në pyetje mbi financimet të dyshimta për fushatën presidenciale të vitit 2007 ku dhe doli fitues. Ai po mbahet në ambientet e paraburgimit në Nanterre. Ndalimi mund të zgjasë deri në 48 orë.
Sipas mediave franceze, lajmi për ndalimin e Sarkozy është dhënë nga burimet zyrtare dhe bëhet fjalë për një hetim ku njerëz të stafit elektoral të tij kanë marrë fonde nga Libia në atë kohë nën regjimin e Moammar Gadafit. Shuma llogaritet mbi 50 milionë euro.
Hetimet për financim të paligjshëm të fushatës zgjedhore nisen që në vitin 2013, një vit pasi Srkozi la presidencën për t’u zëvendësuar nga Francais Hollande. Por, dyshimet për financimin e paligjshëm linden që në 2012-tën, kur në internet u publikua një dokument ku përmendej financimi i Gaddafit për fushatën.
Oficerët e policisë të Zyrës Qendrore për Luftën kundër Korrupsionit kanë dorëzuar një raport në gjykatë, në të cilin shpjegohen detaje se si qarkullonin paratë brenda ekipit të fushatës së ish-kreut të Elizesë.
Deri më tani, Nikolas Sarkozi i ka mohuar akuzat, por vendimi i gjykatës për ndalimin e tij, sipas mediave nënkupton se gjyqtarët kanë mbledhur fakte të mjaftueshme. Kjo është hera e parë që Sarkozi merret në pyetje në lidhje me këtë hetim.
