Është ndarë nga jeta në moshën 101 vjeçare biznesmeni dhe filantropi i njohur David Rockefeller, trashëgimtar i njërës prej familjeve më te famshme dhe më me ndikim në SHBA. Ai vdiq në shtëpinë e tij në Nju Jork, si pasojë e insuficiencës kardiake. Rockefeller la pas një pasuri prej 3,3 miliard dollarësh sipas revistës “Forbes”. Ai ishte drejtor ekzekutiv i bankës “Chase Manhattan”, ku qëndroi për 35 vite. Ajo njihet si banka e Rockefellerëve, edhe pse familja e tij zotëronte vetëm 5% të aksioneve. David Rockefeller ishte djali i John D. Rockefeller Jr, që ndërtoi Qendrën e famshme Rockefeller në Nju Jork dhe nipi i themeluesit të Standard Oil, John D. Rockefeller.
Si bankier ai pati marrëdhënie të ngushta me qeveri dhe korporata të mëdha, si dhe kontakte me politikanët më të pushtetshëm te botes. Si filantrop ai u ka dhuruar 2 miliard dollarë institucioneve të ndryshme, përfshirë Universitetin Rockefeller, atë te Harvardit dhe Muzeun e Artit Modern.
Në një deklaratë të Fondacionit Rockefeller, ai vlerësohet si një nga figurat më me ndikim në historinë e filantropisë amerikane dhe te financave. Shpesh ai fliste për kapitalizmin amerikan, që sipas tij, u kishte sjellë më shumë përfitime njerëzve se çdo sistem tjetër në çdo pjesë te botës përgjatë historisë.
