Aktorja dhe këngëtarja franceze Brigitte Bardot, një nga figurat më emblematike të kinemasë europiane, e cilësuar si gruaja më e bukur e shekullit XX, ka ndërruar jetë në moshën 91-vjeçare. Ajo u shndërrua në simbolin ndërkombëtar të sensualitetit gjatë viteve 1950 dhe 1960, përpara se të largohej nga industria e filmit dhe t’i përkushtohej aktivizmit për mbrojtjen e kafshëve, si angazhimeve politike që shpesh shkaktoi polemika.
Bardot arriti famën botërore me filmin And God Created Woman (1956), shkruar dhe drejtuar nga bashkëshorti i saj i atëhershëm, Roger Vadim. Roli i saj si një vajzë e lirë dhe rebele në Saint-Tropez theu tabu dhe e vendosi atë në qendër të vëmendjes ndërkombëtare, duke e kthyer në ikonë të kulturës pop dhe në një nga yjet më të kërkuara të ekranit francez.
E lindur në Paris në vitin 1934, Bardot u rrit në një familje tradicionale katolike. Ajo spikati që herët në balet, duke fituar të drejtën për të studiuar në Konservatorin e Parisit. Paralelisht, nisi punën si modele dhe në moshën 15-vjeçare u shfaq në kopertinën e revistës Elle, një ekspozim që i çeli dyert e kinemasë. Pas roleve të para, ajo u bë e njohur edhe për publikun britanik me filmin Doctor at Sea (1955).
Suksesi i filmit And God Created Woman e katapultoi Bardot në radhën e parë të kinemasë franceze. Shumë shpejt, ajo u shndërrua në burim frymëzimi jo vetëm për publikun, por edhe për artistë e intelektualë. Simone de Beauvoir e përshkroi atë si gruan më të çliruar të Francës, ndërsa në vitin 1969 Bardot u zgjodh modeli i parë real për Marianne, simbolin e Republikës Franceze.
Gjatë viteve ’60, Bardot luajti në disa nga filmat më të rëndësishëm të kohës, përfshirë The Truth të Henri-Georges Clouzot, Very Private Affair të Louis Malle dhe Contempt të Jean-Luc Godard. Ajo pranoi edhe oferta nga Hollivudi, duke u shfaqur në filma si Viva Maria! dhe Shalako, përkrah aktorëve të njohur ndërkombëtarë.
Paralelisht me kinemanë, Bardot pati edhe një karrierë muzikore. Ajo regjistroi versionin e parë të këngës Je T’Aime… Moi Non Plus të Serge Gainsbourg, e cila më vonë u bë hit botëror në interpretimin e Jane Birkin.
Megjithatë, fama dhe presioni i vazhdueshëm e shtynë Bardot të tërhiqej nga aktrimi në vitin 1973, në moshën 39-vjeçare. Që prej asaj kohe, ajo iu përkushtua mbrojtjes së kafshëve, duke marrë pjesë në protesta dhe duke themeluar Fondacionin Brigitte Bardot në vitin 1986. Ajo u angazhua në fushata ndërkombëtare kundër gjuetisë së fokave, vrasjes së delfinëve dhe keqtrajtimit të kafshëve në vende të ndryshme.
Në vitet e mëvonshme, Bardot u bë figurë gjithnjë e më e debatueshme për shkak të deklaratave dhe qëndrimeve të saj politike, veçanërisht mbështetjes për të djathtën ekstreme në Francë, çka i solli edhe dënime gjyqësore për nxitje të urrejtjes racore.
Brigitte Bardot u martua katër herë dhe pati disa lidhje të bujshme me figura të njohura të artit dhe kinemasë. Pavarësisht polemikave, ajo mbetet një nga figurat më ndikuesе të historisë së kinemasë franceze, një grua që ndryshoi mënyrën se si shiheshin feminiteti, fama dhe liria personale në ekran.
