NATO vendos komandën tokësore në Finlandë, afër kufirit rus

NATO do të krijojë një komandë të re tokësore në Finlandë pranë kufirit rus vitin e ardhshëm, e ngarkuar me drejtimin e operacioneve të forcave tokësore të aleancës në Evropën veriore në rast të një konflikti ushtarak, tha të premten ministri i mbrojtjes i Finlandës.

Finlanda iu bashkua aleancës së NATO-s vitin e kaluar, pas pushtimit të Ukrainës nga fqinji i saj Rusia që filloi në vitin 2022 dhe po organizon praninë e aleancës në tokën e saj.

Buxheti vjetor prej 8.5 milionë euro

“Këtë mëngjes vendosa që do t’i propozojmë NATO-s krijimin e komandës së bashku me shtabin e ushtrisë në Mikkeli,” tha ministri Andi Hakanen, pas njoftimit të tij në qershor se të gjitha vendet anëtare të NATO-s kishin dhënë pëlqimin e tyre politik për planin.

Hakanen, duke folur në një konferencë për shtyp, tha se njësia fillimisht do të ketë një buxhet vjetor prej 8.5 milionë euro dhe do të ketë personel nga zyrtarë ndërkombëtarë.

Në fillim të këtij muaji, Finlanda dhe fqinji i saj Suedia, të cilat gjithashtu iu bashkuan aleancës këtë vit, njoftuan se Suedia do të koordinojë vizitat e trupave të huaja të NATO-s, si dhe stërvitjet ndërkombëtare në Finlandën veriore./vizionplus.tv