Edhe në ditën e dytë të punimeve, në fokus të samitit të NATO-s që po mbahet në Vilnius të Lituanisë ka qenë çështja e Ukrainës.
Samiti nuk i dha Kievit një rrugë të qartë drejt anëtarësimit në aleancë megjithatë, fuqitë perëndimore po diskutojnë të shpallin një marrëveshje sigurie ndaj vendit si mbrojtje ndaj sulmeve ruse.
Kreu i Aleancës Veriatlantike, Jens Stoltenberg, foli për mediat së bashku me presidentin ukrainas Volodymir Zelenski dhe tha se Kievi është tashmë më afër se kurrë me NATO-n.
JENS STOLTENBERG
KREU I NATO
“Ukraina tani është më afër NATO-s se kurrë më pare. Ne duhet të sigurojmë që kur të përfundojë kjo luftë, të ketë marrëveshje të besueshme të cilat do të ndihmojnë në parandalimin e çdo agresioni të ardhshëm nga Rusia. Do të jetë një tragjedi për Ukrainën nëse presidenti Putin fiton por do të jetë e rrezikshme edhe për ne, do të na bëjë më të pambrojtur.”
Stoltenberg foli gjithashtu edhe për krijimin e këshillit të ri NATO-Ukrainë dhe riafirmimin e anëtarësimit të Ukrainës në aleancë.
Ndërsa presidenti ukrainas Volodymir Zelensky tha se e kupton faktin që disa vende kanë frikë nga anëtarësimi i Ukrainës në NATO.
“Ftesa për anëtarësimin e Ukrainës në NATO do të ishte ideale. Po unë e kuptoj pse disa vende janë të frikësuara, sepse askush nuk dëshiron të ketë një luftë botërore.”
Megjithatë ai shtoi se rezultatet e samitit ishin të mira referuar procedurave të anëtarësimit dhe paketave të mbrojtjes që shtetet ofruan. Gjatë pasdites, Zelensky do të zhvillojë një takim dypalësh me presidentin amerikan, Joe Biden.
