Fluks i lartë lëvizjeje në pikën e kalimit kufitar të Kapshticës.
Gjatë ditës së sotme ka pasur lëvizje të shumta si në hyrje ashtu edhe në dalje. Burime zyrtare nga Drejtoria Vendore e Policisë bëjnë të ditur se gjatë 24 orëve të fundit kanë hyrë dhe kanë dalë më shumë se 11500 shtetas shqiptarë dhe të huaj.
Për autoritetet kufitare ky fluks i ditës së sotme nuk ka qënë i pritshëm, pasi nisur edhe nga përvoja e viteve të kaluara lëvizjet më të shumta kanë qenë të regjistruara gjatë periudhës së Krishtlindjeve.
Fluksi ka qenë mjaft i madh edhe në dalje pasi kanë qenë të shumtë edhe personat që kanë zgjedhur të kalojnë jashtë vendit festën e Vitit të Ri.
Për të përballuar fluksin autoritetet kufitare kanë punuar me kapacitet maksimal sportelesh deri në 7 të tilla, të cilat janë alternuar si në hyrje ashtu dhe në dalje.
Nga ana tjetër pala greke ka vijuar të punojë me sportele të reduktuara, por ka arritur të menaxhoje fluksin pa shkaktuar radhë të panevojshme.
