Napoli është finalistja e parë e superkupës së Italisë. Skuadra e Maxarrit mundi 3 me 0 Fiorentinën në Riad të Arabisë Saudite aty ku po zhvillohen ndeshjet e këtij trofeu, për herë të parë në formatin e ri me 4 skuadra.
Ishte në fakt një gjysmëfinale që ndryshe nga sa tregon rezultatin, nuk pati kurrësesi këtë diferencë edhe në lojë, përkundrazi Fiorentina ishte ajo që u përpoq të bënte më shumë lojë, por Napoli goditi duke kaluar në avantazh përmes Xhovani Simeones në minutën e 22. Vjollcët nuk u demoralizuan duke kërkuar barazimin.
Fillimisht u ndalën nga shtylla në tentativën e Martinez Kuqarta në minutën e 28 dhe rasti më flagrant ishte penalltia e minutës së fundit të pjesës së parë humbur nga Ikone me sulmuesin francez që goditi mbi kuadrat.
Pak a shumë edhe pjesa e dytë pati të njëjtën pamje, me pak raste për shënim. Fiorentina më kërkuese dhe Napoli i kujdesshëm sidomos në fazën mbrojtëse. Gjithçka ndodhi në 6 minutat të fundit të takimit. Hero ishte Xerbin i futur në fushën e lojës nga Maxarri në pjesën e dytë, në minutën e 84 ai përfitoi nga një pasim i Di Lorencos dhe shënoi golin e dytë, por duke u dëmtuar pasi u përplas me shtyllën.
Me të kaluar frika nga ky dëmtim, Xerbin kthehet në fushën e lojës dhe shënon edhe golin e dytë personal; dhe të tretin për Napolin që tanimë pret sonte fituesen e çiftit Inter-Lacio për tu përplasur në finale e 22 janarit. Zikaltrit janë ndjeshëm të favorizuar pasi po bëjnë një super sezon, mirëpo për bardhekaltrit kjo është një mundësi unike për të shpëtuar sezonin duke tentuar fitimin e një trofeu./vizionplus.tv
