Çmimi i naftës në tregjet e huaja ka zbritur në 81 dollarë për fuçi, niveli më i ulët në 11 muajt e fundit.

 

Në bursën e Londrës ari i zi pësoi një rënie me gati 3 dollarë, e ndikuar kryesisht nga situata në Kinë, ku ka shqetësim për një kërkesë më të ulët për karburante për shkak të rritjes së rasteve me COVID-19, por edhe nga pasiguria politike.

 

Edhe më i ulët është çmimi i naftës bruto amerikane, e cila po tregtohet për 74 dollarë për fuçi, nga 78 që ishte tre ditë më parë.

 

Megjithatë, tregjet mbeten të paqëndrueshme dhe në ditët në vijim pritet që çmimi i naftës të ndryshojë sërish, në varësi edhe të rezultatit të takimit më 4 dhjetor të Organizatës së Vendeve Eksportuese të Naftës, e cila më herët uli prodhimin me 2 milionë fuçi në ditë.

 

Paralelisht, vendet e G7 dhe diplomatët e Bashkimit Evropian janë në diskutime për të vendosur një kufi të çmimit të naftës ruse, i cili pritet të hyjë në fuqi më 5 dhjetor, si një masë për të ulur të ardhurat që Rusia fiton nga shitjet.

 

Si kundërpërgjigje, presidenti rus Vladimir Putin ka paralajmëruar se Moska nuk do të shesë naftë ndaj vendeve që bëhen pjesë e marrëveshjes për vendosjen e këtij tavani.

Leave a Reply

Your email address will not be published. Required fields are marked *