Nis rehabilitimi i rreth 7000m2 në parkun Rinia të qytetit të Korçës duke zgjeruar edhe më tej këtë sipërfaqe të gjelbëruar dhe mjaft të frekuentuar jo vetëm nga qytetarët vendas por edhe nga vizitorë e turistë të shumtë. Zgjerimi i parkut Rinia ka qenë synim i hershëm i bashkisë së Korçës që tashmë ka nisur të kthehet në realitet, duke ndërhyrë në pjesën fundore të parkut për ta sistemuar e niveluar, deri tek ish gjeologjia, aty ku do të shtrihen edhe tubacionet për ujitjen në formë shiu.
Ashtu si edhe një vit më parë kur u prenë rreth 10 plepa të vjetër e të rrezikshëm për qytetarët, edhe këtë vit Ndërmarrja e Shërbimeve Publike ka vijuar me prerjen e rreth 22 plepave në pjesën fundore të parkut, për ti zëvendësuar me rreth 50 apo 60 pemë të llojeve të ndryshme të cilat do të mbillen në këtë zone.
Parku Rinia në Korçë i krijuar prej viteve ‘50-’60 konsiderohet si mushkëria e qytetit. Pas investimeve të kryera nga bashkia e Korçës disa vite më parë ky park ka marrë një formë bashkëkohore, ndërsa është siguruar edhe ujitja në të gjithë sipërfaqen e tij, çka bën që gjelbërimi të jetë gjithëvjetor. Zgjerimi edhe më tej i parkut më të madh të qytetit të Korçës do të krijojë edhe më shumë mundësi për shëtitje dhe kalimin e kohës së lirë për qytetarët e vizitorët e shumtë që e popullojnë çdo ditë.
