“Një mrekulli Krishtlindjesh”. Kështu konsiderohet ndarja me sukses e binjakeve siameze Ailani dhe Alif Palacios Picón në Peru.
“Ato janë mirë dhe rikuperimi i tyre na mbush me gëzim”, u shpreh ministri i Shëndetësisë, Luis Quiroz.
Binjaket siameze kishin lindur para kohe më 5 tetor në Spitalin Hermilio Valdizán dhe u shtruan në spital më 8 tetor, vetëm tre ditë pas lindjes, me një peshë nën 3 kilogramë.
Prindërit e tyre, Marleni Picón dhe Menelio Palacios, ia besuan jetën e vajzave specialistëve.
Pas javësh ekzaminimesh të detajuara dhe rezonancash magnetike, një ekip prej më shumë se 16 mjekësh, infermierësh dhe teknikësh ndërmori ndërhyrjen vendimtare.
Më 18 dhjetor 2025, pas një operacioni që zgjati rreth tre orë, u realizua ndarja e suksesshme e Ailani dhe Alif.
U përdorën teknologji inovative si printimi 3D dhe realiteti virtual, të cilat mundësuan planifikim të detajuar paraoperativ me modele anatomike të personalizuara, duke ulur rreziqet, kohën kirurgjikale dhe humbjen e gjakut.
“Ato lindën si binjake të bashkuara. Sot, falë punës së një ekipi të talentuar, po shohim këtë mrekulli të Krishtlindjes, një akt dashurie. I shohim të shëndetshme, duke u rikuperuar”, tha Zulema Tomas Gonzales, drejtore e spitalit.
Për babanë e tyre, Menelio Palacios, ky ishte momenti që kishte pritur që nga dita e lindjes së vajzave.
“Doja t’i shihja të ndara, jo më të shtrira bashkë. Më parë qanin, mërziteshin, por tani janë të ndara dhe të lumtura. Gjithçka falë mjekëve dhe kirurgëve që e realizuan këtë qëllim”, tha babai, Menelio Palacios.
Autoritetet shëndetësore në Peru e kanë cilësuar rastin si një arritje të jashtëzakonshme, duke marrë parasysh lindjen e parakohshme dhe kompleksitetin e gjendjes shëndetësore të binjakeve.
